Assalamualaikum Wr.Wb
A’udzubillahiminasyaitanirrajim,
Bismillahirrahmanirrahim, Alhamdulillahirobbl’alamin, Wabihinastanginungala
Umuridunyawaddin, Sayyidina Wamaulana Muhammadin, Wa’alaalihi Wasahbihi
Ajma’in, Qala Rabbisrahlisadri, Wayassirli Amri, Wahlu’uqdatammillisani Yafqahu
Qauli, Ammaba’du.
Panjenenganipun para alim
ulama ingkang tansah minulya,
Panjenenganipun Bapak Camat,
Bapak Kapolsek, Bapak Danramil, Bapak KUA kecamatan Moyudan, Bapak Lurah
Sumberagung ingkang tansah kinurmatan,
Para sesepuh pini sepuh
ingkang tansah kita bektosi,
Sedaya Takmir Masjid Taqwa
rokhimakumullah,
Para pilenggah, tamu undangan,
Jama’ah Masjid Taqwa Pendulan ingkang bagya mulya.
Langkung rumiyin, sumangga kita sami ngaturaken puji
syukur dhumateng ngarsanipun Allah Swt, ingkang sampun kepareng paring
kanugrahan, arupi kasarasan jasmani lan rohani, satemah ngantos wekdal punika
panjenengan dalasan kula saged ngrawuhi acara
pengetan tanggap warsa 1 Muharram 1436 Hijriah kanti wilujeng mboten wonten
alangan setunggal punapa. Shalawat sarta salam mugi tetep katur kunjuk
dhumateng junjungan Nabi Agung Muhammad saw, ingkang kita antu-antu
syafa’atipun wonten Yaumil Qiyamah Amin.
Sagung para rawung ingkang bagya mulya,
Keparenga munggel pangandikan sawetawis, nun inggih
kepareng kula matur amakili sedaya kadang panitya pengetan tanggap warsa 1
Muharram 1436 Hijriah.
Sepisan kula ngaturaken sugeng rawuh saha agunging
panuwun dhumateng panjenengan ingkang sampun kersa nglonggaraken wekdal rawuh
wonten ing papan menika saperlu sareng-sareng mengeti pengetan tanggap warsa 1
Muharram 1436 Hijriah.
Bapak ibu sagung para rawuh ingkang tuhu kinurmatan,
Kaping kalihipun kula dalasan para kanca ingkang ngayahi
karya wonten ing wekdal punika ngaturaken agunging panuwun dhumateng bapak ibu
ingkang sampun paring pambiyantu ingkang awujud menapa kemawon, satemah saged
damel rancag lancaring acara wonten ing wekdal punika. Mugi-mugi kesaenan
panjenengan cinathet minangka amal jariyah lan katampi wonten ngarsanipun Gusti
Allah lan mugi kaparing piwales ingkang sakalangkung kathah.
Salajengipun kula sakanca nglenggana sadangunipun ngayahi
karya wonteng ing wekdal punika, anampi rawuh panjenengan, caos papan
palenggaan lan ugi dhaharan lan unjukan tentu kathah kekirangan saha boten
damel renaning penggalih panjenengan. Awit saking punika kula dalasan sedaya
kadang panitya nyuwun agunging pangaksami.
Wekasan kula sakanca anggadahi pangajap mugi-mugi kanthi
pengetan tanggap warsa 1 Muharram 1436 Hijriah punika saged andadosaken para
warga tambah sregep anggenipun ngibadah dhumateng Gusti Allah .
Mekaten ingkang saged kula aturaken amakili para kadang
panitya. Saestu atur kula kathah kalepatan saha kakiranganipun kula nyuwun
agunging sih samudra pangaksami.
Wassalamualaikum. Wr. Wb.
apik
ReplyDelete